Biolur Gipuzkoa, 1993an, nekazaritza ekologikoaren alde lan egiteko sortu zen elkartea da. Gure helburu nagusia nekazaritza ekologikoa sustatzea da, Gipuzkoako lur eta baserriek etorkizun duin bat izan dezaten eta, naturaren erritmoak jarraituz, osasuntsuak diren elikagaiak ekoitzi daitezen.

Zer eskaintzen du nekazaritza ekologikoak ?
Biolurrek, Nekazaritza Ekologikoa, bertako nekazaritzaren biziraupenerako oinarrizko eredutzat izateaz gain—nekazaritza dagoen egoeran ekoizle ekologiko kopurua igo dela ikusi besterik ez dago—eredu honek, lurraren
emankortasuna zaintzen du, naturaren lege eta erritmoak errespetatuz. Baina ez hau bakarrik, emankortasun hau hobetzen ere saiatzen baita horretarako egokiak diren teknikak erabiliz: ongarri berdeak, txandatzeak, eta abar. Gainera, inguruarentzat kutsatzaileak diren aktibitateak ekiditen ditu aldaketa klimatikoari eusten lagunduz, eta
naturak berezkoa duen bioaniztasuna zaintzen du bertako barietate eta arrazei garrantzia emanez eta genetikoki eraldaturiko organismoak baztertuz. Abereen ongizatea ere bermatzen du maneiu egokien bidez, gaixotasunen prebentzioa izanik oinarritzat eta hormona eta antibiotikoak ekidinez. Beraz, Biolurreko kideon artean guzti hau bermatzen saiatzen gara, kalitatezko elikagai osasungarriak izanez emaitza.

Zer eskaintzen du Biolurrek?
✮ Informazio Orokorra:
Nekazaritza eta abeltzaintza ekologikoari buruzko informazioa eskaintzen dugu, ekoizle, kontsumitzaile eta interesa duen ororentzat.
Aholkularitza teknikoa:
Ekoizleak interesaturik dauden edo zalantzak pizten dizkien gaietan aholkularitza eskaintzen da, lan talde mailan zein partikular Ondorengoak dira elkarteak martxan dituen lan taldeak eta bertan lantzen
diren gaiak:
• Baratzezainak: lan tekniko desberdinak jorratzen dihardugu, hala nola, barazki barietate desberdinak probatu, hazi eta landare ongarri ekologikoak eskuragarri jarri, ekologikoan erabiltzen diren teknikak garatu, landareen osasunerako produktu naturalak lortu, besteak beste.
• Frutazainak: fruta ekologikoa baserri gehienetan ekoizpen osagarri bat bada ere, gero eta gehiago dira ekologikoan dabiltzanak eta frutazainen beharrizanei erantzun emateko taldea antolatu berri dugu elkartean
• Okinak: baserriko ogi ekologikoa egiten dugun okinek talde honen bitartez ogia egiteko beharrezko alearen erosketa bateratua antolatzen dugu, ahalik eta gertueneko nekazariekin lotura zuzenak landuz, ogiaren kalitatea jorratuz.
• Abeltzainak: ekologikoan aritzeko ekoizpen sistemak hobetzeko lantaldean eta baita ekoizpen hauei irtenbide emateko estruktura mankomunak martxan jartzen.
✮ Azpiegitura komunak:
Ekoizpen ekologikoak azpiegitura espezifikoak behar ditu eta Biolurretik azpiegitura hauek sortzeko erraztasunak eskaintzen zaizkie ekoizleei, indibidualki zein kolektiboki.
✮ Kontsumitzaileentzat informazioa:
Bazkide diren kontsumitzaileei, produktu ekologikoak errazago lortu ahal izateko informazioa eskaintzen zaizkie, ekoizle-kontsumitzaile harremanak sustatuz.
✮ Tokiko ekonomia, bidezkoa eta soziala:
Gipuzkoaren orografiaren ezaugarriak direla eta, malda handiak eta lur eskasia kontutan hartu beharreko errealitatea dira. Hau dela eta, ekoizpen eta instalakuntza txikiak ditugu bertan, eta marko honen barruan, ekoizten den
elikagaiari balore erantsia gehitzeak eta ahalik eta hurbilen komertzializatzeak soilik egiten dio mesede ekonomia honi. Biolurrek, era honetako komertzializazio kanal ezberdinetara iritsi eta garatzeko lan egiten du, eskoletako jantoki
ekologikoei buruzko proiektuak aurrera eramanez, adibidez.

EKOLAPIKOA MUNDUMIRAN

Ekolapiko Elikadura ekologiko eta orekatu baten aldeko proiektua da, bertako produktu ekologikoen erabileran oinarritua. 2006ko abenduaz geroztik dihardu Biolurrek proiektu hau lantzen Donostiako Udalarekin eta Cristina Enea fundazioarekin batera, bertako hiru Udal Haur Eskoletan martxan jarriz. Poliki-poliki, Behemendi Landa Garapeneko Elkarteak bultzaturik Donostialdeko beste haur eskola batzuetara hedatzen joan da, Oiartzungo Haurtzaro kasu. Gaur egun Kutxak ere babesten du Ekolapikoren hedapena.
Ekolapiko proiektu borobila da eta bere garrantzia duen pluraltasunean dago, elikadura oinarri harturik, ondorengo arloetan eragiten duelako: osasunean, landa garapenean eta ingurumenean. Azken finean batak bestearengan eragiten du: batetik, nekazaritza ekologikoaren praktikak ingurumena zaintzen du, bionaiztasuna bermatu, kutsadura ekidin; bestetik, bertatik lortzen diren elikagaiak garbi eta bizitasun handikoak dira garapen prozesuan dauden haurrentzat, eta zer esanik ez elikadura orekatuaren oinarriak txertatuz eta garaian garaiko produktuak kontsumituz; eta azkenik, nekazari ekologikoak biltzea ahalbidetzen duen proiektua izanik, nekazaritzaren garapena, antolaketa eta salmenta bide motz eta berri baten irekiera bermatzen du, bertako eta garaiko elikagai ekologikoak bertako ikastetxeetara bideratzen direlako. Mundumiran baina, Ekolapiko era praktiko batetan nola gauzatzen den ikusi ahal izango duzue: Biolurreko postuan bertako ekoizle ekologikoen elikagaiak egongo dira eskuragarri, barazki, gazta, edari, eta abarrekin; baina ez hori bakarrik, larunbat eguerdian, produktu hauekin batera, Ekolapikoa duten eskoletako menu aukera bat eskainiko dugu Sabrina Pato Ekolapikoko Elikadura Hezitzailearekin. Asteburuan zehar elikagai ekologikoak erosi, dastatu eta hauei buruzko informazioa jaso ahal izango duzue bertan, eta larunbat eguerdian, Sabrinaren aldetik haurren elikadurari buruzko aholkularitza jaso.